صانعة تمثال محمد صلاح في منتدى شباب العالم تدافع عن نفسها وترد على منتقديها
صانعة تمثال محمد صلاح في منتدى شباب العالم تدافع عن نفسها وترد على منتقديها:
تناول رواد ونشطاء السوشيال ميديا بمختلف مواقعها تمثال اللاعب المصري محمد صلاح لاعب ليفربول والذي نحتته الفنانة مي عبدالله بكثير من السخرية والانتقاد مما جعل الناحتة مي عبد الله ترد على منتقديها بقوة عبر صفحتها الشخصية على موقع التواصل الإجتماعي فيس بوك، تعرف على ردها من خلال الأسطر التالية…
رد الناحتة الفنانة مي عبد الله صاحبة تمثال محمد صلاح:
لما بدأت فى التمثال مكنتش عاملاه لمنتدى الشباب، ولا للمعرض، بدأته هنا معاكم _ تقصد على صفحة الفيس بوك_ وكنت بشرح خطوة بخطوة والمراحل، ووصلنا مع بعض لمرحلة كويسة، وكنت بعمله بس لغرض عن الناس إللى مش مختصة وعندها الموهبة عاوزه تتعلم تعرف خطوات بسيطة تمهد لها الطريق إنها تبدأ مشوارها، واللى عاوز يتأكد يرجع فى بوستاتي شويه هتلاقى كل التفاصيل، وإزاى الناس كانت بتستفيد.
يعنى مكنش غرضى اعمل تصميم جامد ولا فكرة خرافية قد ما كان قصدى اساعد الناس اللى بتسألنى، وناس كتير تابعت الخطوات معايا وعرفوا إزاى يبدأوا لوحدهم من أول ما بيروحوا الحداد ويعملوا كاريكاز لحد ما يخلصوا الشغل ويصبوه كمان بغض النظر عن الشغل ده هو ايه، دا كان مجرد مثال بشرح عليه، وكنت بخلص بسرعه بسرعه عشان كنت بنزل كل يوم خطوة، مع إنى كنت مضغوطه فى شغل المعرض بس حتى لو شخص واحد استفاد كنت بفرح.
مع إن ناس كتير اضايقت منى وقالتلى متكمليش خطوات ودى أسرار شغل زى ما سموها إلا أنني أصريت وكملت عشان يمكن أفيد حتى شخص واحد، وثاني خطوة لما قررت أكمله للمنتدى، وصلت لمرحلة الجبس اللى لونه ابيض فيها دى، وكان عاجبنى ومقتنعه بيه، وأنا عموما مبحبش حد يمد إيده فى شغلى خالص عشان التفاصيل بتفرق.
وأكملت مي عبدالله حديثها قائلة: المهم لما المنتدى قرروا انه لازم يبقى التمثال برونز اضطريت إني أخلى حد يصبه برونز، والصب دا بياخد وقت كبير ومجهود بيحول التمثال من خامة الجبس لخام النحاس، اتفاجأت آخر يوم قبل تسليم التمثال للمنتدى انه كده! أعمل إيه يعنى؟، مقدرش مسلموش ولا اقدر اقولهم معملتش شغل لأنهم فى المنتدى صارفين عليه وعايزينه، لو معرضي الخاص، مكنتش عرضته غير وأنا راضية عنه.
المهم إنه طلع فى النهاية النتيجة دى، وأنا مش مضايقه ولا زعلانة ولا ندمانة، لأنى عملت اللى عليا واكتر وربنا عالم بتعبى، فوق ما أى حد يتخيل، ومادام أنا عملت اللى عليا و مقصرتش في دي إرادة ربنا إنه التمثال باظ ف الآخر، والتعليقات السلبية مش هتحبطنى، ولا هيأثر فيا، خالص اقسم بالله.
وطالبت مي عبدالله المنتقدين وقالت: بس ياريت الناس تتعلم فن النقد بأدب واحترام، لأن مش أي حد يتحمل نقد زى دا، أنا الحمد لله قوية، ولو مش قوية مكنتش عملت مشروع التخرج اللى مصر كلها اتكلمت عليه، ولا كنت كملت لكن أنا هكمل ، وهفاجأكم فى مشروعك القادم اللى التمثال ده بالنسباله ولا حاجه ٢٢ تمثال فى معرضي القادم آخر الشهر.
